مبارح الصبح بكير
انا وفالة من مدخل البيت، ما بعرف ليه شفت شي غريب كان عندي احساس مخيف! لدرجة انو اجاني حلم اليقظة وشفت بيروت لونها صفرا فيها رمل اصفر وغبار وصعبة صرت احكي حالي قول ليه الناس مش شايفة يلي انا شايفته ؟؟!! ليه الناس عايشة عادي وعم تمشي؟. وانا شايفة هيدا اللون واي شي غريب مخيف! وصلت ع شغلي خبرتهم انو انا اليوم شايفة “بيروت” “قندهار” ما بعرف مين واجا هيدا الاحساس المخيف وليه بلحظة شفتها هيك مريبة ولونها اصفر، ما اخدت واعطيت مع حالي بس استوقفني حلم اليقظة للحظات، وكملت نهاري، قبل ما فل من المكتب ما بعرف ليه زحت الوردة وحاطيتها تحت الباب الزجاج ع اساس بدها شمس، وليه فجاة قررت انو الاربعاء انا مي نازلة على الشغل ضبضبت كل اغراضي ولابتوب واوراق وانا فالة صفنت بالشجرة معقول تكون لان راح يضرب فيها ل ac وانا دائما عندي فال سيء مع موت الزهر عندي بالبيت قلت بين حالي مين راح يموت !!! قفلت الباب كل عمري بستودع او اي مكان بكون فيه ما بذكر اذا انا استودعته هيدي المرة ، بس كل يلي كنت مصرة عليه انو خلص ما راح اجي هالفترة وفلت بسرعة ما بعرف ليه! مكتبي مطله “المرفأ” هلق بحوط ورك المطل يعني انا يوميا بتفرج عليه او مطل بسيط لان في مسافة ! بس لو كنت اولا كان نزل الباب الزجاج وما بعرف اذا كن بلحق شوف المرفأ!!
فلت وصلت على البيت قبل ما انزل من استوقفني دعاء ما بعرف ليه هيك فجأة مع انو صرت تحت البيت ورددت الدعاء ٣ مرات ، “اللهم لا نسألك رد القضاء بل نسألك اللطف فيه” ونزلت من سيارتي واستودعتها وطلعت على البيت.
كان عندي وجع كل النهار برأس معدتي رجعت الوجع انو ضرب ال ac فيها بس كانت قادرة اتحمل وجعي كتير معصبة معدتي بشكل مخيف! صرت كل شوي اخترع سبب، بس ما فهمت ليه !!!
اجا جدي فجأة لعنا، قام بابا وماما بدهم يوصلوا بنات أخي التؤام على عرمون، واخدوا جدي معهم ع اساس يقطعوا ياخدو ستي كمان ! ضهروا بالسيارة.
انا كنت قاعدة على كرسي بالغرفة عندي تحت الشباك كان طول الوقت في صوت طيران وانا اسال حالي يعمي ليه هالازعاج حاليا شوفي!! ما في دقيقتين من ضهرة اهلي راح واجت الكرسي في، قلت هيك عم اصرخ لاخي وطلع الصوت القوي يلي هز البيت كلهم سوا وصرنا نسماع اصوات من برا اخدت حقيبتي والباسبور ع اساس هزة وننزل لتحت وانا قلت خلص راح يصير زلزال خلص! بس نحن وطالعين شفنا الناس برا من البرندا ودخنة كتير قوية دغري عرفنا انفجار !! بس انفجار وين وبمين؟ واهلي وين ومعهم اطفال! اتصلت بأمي الها روحوا عندي ستي وخليكم هونيك وهي تقلي لا الانفجار بجامع الامام علي وانا قلها لا على الكورنيش ! كل يلي بعرفه انو هيدا الصوت ويلي حاسينا كان شي كتير رعب وقاسي جدا ! ويلي اهلي يلي طارت السيارة على قوة الانفجار بس الحمدلله الله سلمهم جميعا! ويلي انا واخي يلي بطلنا فاهمين شي، وما كان في كهرباء كمان حتى نعرف ! وقفت الاتصالات بدي اطمن ع رفقاتي يلي بعدهم بالشغل ! وبدي اطمن عن قرايبين اذا في حدا برا ! بس الحمدلله الله قدر ولطف! كانت الاضرار مادية والحمدلله !
بس الاضرار المعنوية والنفسية من بعد ما بلشت افهم شو عم بصير صعبة كتير !
انا لهيدي اللحظة مش مصدقة يلي صار ومش مصدقة انو بيروت قطعت بهيدا اللون الاصفر وانو هلق صار لونها رماد واسود وانو بيروت شلحت توب الحياة والجمال وجعلوها ارملة منكوبة متشحة بالسواد! هيدي مش بيروتنا ولا بيروت رفيق الحريري ولا العاصمة بيروت الابية !! بيروت على مر السنين برمت ٧ مرات بين هزات وحريق هائل صار فيها !! والظاهر هيدي الثامنة! يلي بيعرف بيروت فعلا صعب عليه يقدر يستوعب يلي صار .
هيدي قصة صغيرة جدا صغيرة وكتير صغيرة من قصص ٤ اب ٢٠٢٠ من بيروتشيما في قصص كتير كتير واصعب بكتير ! في بكي وحزن كبير ! راحت بيروت نامت هلق بسبات عميق اذا ما فاقت بيروت نحن مش راح نفيق !!
#بيروت هل تسمعينني ؟
بيروت ألم تستيقظي بعد؟
بيروت لقد طل النهار ؟
بيروت ؟! بيروت ؟ فيقي فيقي!!
بيروت ما بيلبقلك تموتي،بيروت فيقي؟؟ بيروت بعد فيك نبض؟بيروت ؟قومي شوي، قومي قومي!! يلا قومي ارجعي، بيروت تعبتِ؟ بيروت عم احكي معك ايه ما عم تسمعيني ؟؟ حزينة ع اولادك ؟ حزينة ع حالك؟؟
بيروت ؟ فيقي 😞
ملاحظة: صور مش انا مصورتهم ! الا صورة الاولى المطل من المكتب
صوت الوحيد يلي بتسمعه بكل بيروت هو صوت
الزجاج وبس !!
صوت بكاء بيروت هو صوت الزجاج المتناثر 😢😢😢😢
Leave a Reply